Angliya Premyer-ligasining navbatdagi turi doirasida kechgan «Manchester Yunayted» hamda «Aston Villa» uchrashuvi oldidan qiziqarli voqea yuz berdi. «Qizil iblislar»ning ashaddiy muxlislari klub egalarining olib borayotgan siyosatiga qarshi navbatdagi norozilik namoyishini uyushtirdilar. Stadion atrofida va tribunada ishqibozlar klub rahbariyatining iste'fosini talab qiluvchi maxsus «Owners out» yozuvi tushirilgan bannerlarni namoyish etishdi. Bu kabi noroziliklar jamoaning so'nggi yillardagi qoniqarsiz natijalari va boshqaruvdagi muammolar fonida tobora ko'payib bormoqda. Shuningdek, o'yinning 21-daqiqasida muxlislar tomonidan tribunani ommaviy ravishda tark etish aksiyasi («walkout») ham rejalashtirilgan edi. Biroq xabarlarga ko'ra, ushbu aksiya oxirigacha amalga oshmagan va ishqibozlarning bir qismi o'z joyida qolgan. Klub atrofidagi bu kabi muhit jamoaning maydondagi o'yinlariga ham o'z ta'sirini ko'rsatmay qolmayapti. Muxlislar rahbariyat o'zgarishini talab qilib, o'z noroziliklarini turli yo'llar bilan bildirishda davom etmoqdalar.