Ingliz futbolining quyi ligalarida voyaga yetmagan yosh ultras guruhlarining tartibsizliklari jiddiy xavotirlarni keltirib chiqarmoqda. Joriy mavsumda mamlakatning janubiy qirg'oqlaridan shimoli-sharzigacha bo'lgan hududlardagi klublar 18 yoshga to'lmagan, ba'zan hatto 10 yoshli bolalar tomonidan sodir etilayotgan huquqbuzarliklar haqida bong urmoqda. Bunday holatlar «Hednesford Town», «Aldershot Town», «Enfield Town», «Redditch United» va «Gloucester City» kabi jamoalar o'yinlarida ham kuzatilgan. Masalan, «Hednesford Town»ning yosh muxlislari — o'zlarini «maktab xuliganlari» deb atovchi guruh Chesterdagi safar o'yini oldidan mahalliy yoshlar bilan to'qnashuv kelib chiqqan. Hodisa vaqtida taksiga hujum qilinib, 16 yoshga to'lmagan shaxs tomonidan sovuq qurol ishlatilgani aniqlangan. Garchi hech kim jiddiy jabrlanmagan bo'lsa-da, politsiya mazkur holat yuzasidan tergov boshlagan. «Hednesford» rahbariyati ham avvalroq o'z muxlislarining maydonga bostirib kirishi, pirotexnika vositalarini ishlatishi va futbolchilarga bosim o'tkazishi kabi holatlardan so'ng qator tartibbuzar yoshlarni o'yinlarga kiritmaslik choralarini ko'rgan edi. Klub mutasaddilari va ekspertlarning fikricha, bu holat shunchaki sport doirasidagi muammo emas, balki keng qamrovli ijtimoiy muammoga aylangan. TikTok va Snapchat kabi ijtimoiy tarmoqlar bunday xatti-harakatlarni ommalashtirish va romantizatsiya qilishda asosiy rol o'ynamoqda. O'smirlar o'zlarining «qilvirliklarini» videoga olib, internetda maqtanishi, shuningdek Snapchat xaritasi orqali raqib muxlislar bilan uchrashish joyini kelishib olishi vaziyatni yanada murakkablashtirmoqda. «Redditch» klubi rahbari David Faulkner bu holatni «sayyor sirka»ga qiyoslab, quyi ligalar uchun zamonaviy xavfsizlik talablari yetishmasligini ta'kidladi. Uning so'zlariga ko'ra, hozirgi quyi divizionlar ilgari o'ylanganidan ancha ommalashib ketgan, biroq klublarda yetarli mablag' va CCTV kameralari hamda xavfsizlik xodimlari yetishmaydi. Agar o'z vaqtida chora ko'rilmasa, kelgusida kimdir og'ir tan jarohati olishi mumkinligidan ogohlantirildi. Buyuk Britaniya futbol politsiyasi bo'linmasi (UKFPU) rahbari o'rinbosari Mayk Ankersning aytishicha, bu hozirgi kunda futbol politsiyasining eng muhim yo'nalishlaridan biridir. Politsiya hatto 12-13 yoshli bolalar o'z uylaridan yuzlab chaqirim uzoqlikdagi shaharlarga borib, tartibsizliklar sodir etayotganidan tashvishda. Mutaxassislar bu borada nafaqat politsiya, balki ota-onalar ham mas'uliyatni o'z zimmasiga olishi va farzandlarining harakatlarini nazorat qilishi zarurligini ta'kidlamoqda.
Ingliz futbolining quyi ligalarida yosh ultralar muammosi keskinlashmoqda

Angliya quyi divizionlarida voyaga yetmagan yosh muxlislarning tartibsizliklari va zo'ravonlik harakatlari jiddiy muammoga aylanmoqda. Mutaxassislar va huquq-tartibot idoralari ushbu holatni bartaraf etish uchun tezkor choralar ko'rish lozimligini ta'kidlamoqda. Buyuk Britaniya futbol politsiyasi bu masalani o'zining eng muhim ustuvor vazifalaridan biri deb e'lon qildi.
Manba: The Guardian