«Everton» bosh murabbiyi Devid Moyes klubdagi faoliyati, jamoaning joriy mavsumdagi ijobiy natijalari hamda o'zining murabbiylik faoliyatidagi muhim rekordlar haqida Sky Sports nashriga eksklyuziv intervyu berdi. Hozirda «Everton» Angliya Premyer-ligasi turnir jadvalida yettinchi o'rinda bormoqda va agar o'z uyida «Coventry»ni mag'lub etsa, «Liverpul»ni ortda qoldirib, beshinchi pog'onaga ko'tarilib olish imkoniyatiga ega. Shuningdek, jamoa Liga kubogining chorak finalida «Fleetwood»ga qarshi bahsga tayyorgarlik ko'rmoqda. Moyes kubok bahslari haqida gapirar ekan, «Everton» muxlislari uzoq vaqtdan beri yirik sovrinlarni qo'lga kiritmaganini va uning asosiy maqsadi jamoani yuqori maqsadlar uchun raqobatbardosh qilish ekanini ta'kidladi. U o'tgan yozgi transfer oynasi qiyin kelganini, klub Iliman Ndiayevni sotib yuborganini va kutilgan xaridlarni amalga oshira olmaganini esga oldi. Mutaxassis kelasi oy «Everton» bosh murabbiyi sifatidagi faoliyatida katta marraga yetishini qayd etdi. U klubda ikkinchi marta ishlayotgan bo'lsa-da, umumiy hisobda Xarri Katterikning 592 ta o'yinlik rekordini takrorlashga yaqin turibdi. Moyes bu kabi uzoq yillik barqarorlik va klub afsonalari bilan bir qatorda tilga olinishidan faxrlanishini bildirdi. Intervyu davomida Devid Moyes zamonaviy futbolchilar bilan ishlash, ularning ruhiy holati va bosim ostida qolishi haqida ham fikr yuritdi. U yosh futbolchilarning o'ziga bo'lgan talabi va o'sishga intilishini ijobiy baholadi. Shuningdek, o'zi ham yillar davomida ta'lim olib, zamonaviy tendensiyalarga moslashib kelayotganini ta'kidladi. Mutaxassisning fikricha, murabbiylik faoliyatida uzoq yillar davomida muvaffaqiyat qozonish uchun tinimsiz mehnat qilish va o'z ishiga bo'lgan sadoqat talab etiladi. Moyes kelajakda «Everton»ni yana yevrokuboklarga qaytarish va eng asosiysi, klubga uzoq kutilgan sovrinlarni olib kelish niyatida ekanini yashirmadi.